गूळपोळी

• सारण मऊ होण्यासाठी गूळ कुकरच्या डब्यात घालून झाकण ठेवून भाताबरोबर शिजवून घ्यावा. थंड झाल्यावर वापरावा. मळताना हातास तेल लावावे म्हणजे चिकटत नाही. 

• गुळाला किंचित खारट चव येत असेल तर गूळपोळी हमखास फसते. तीन वाट्या गुळात एक वाटी साखर मिसळली तर गुळपोळी छान होते. 

• सारणात दोन चमचे तेल घालून मळल्यास सारण बाहेर येत नाही. 

• सारण करताना त्यात बेसन भाजून घालावे. खसखस, वेलची इ. घातल्यावर गुळात किंचितसा (हरभऱ्याच्या डाळीएवढा) खायचा चुना घालावा आणि गूळ तेलाच्या हाताने मळावा. पोळी फुटत नाही आणि गूळही पोळीभर पसरतो. 

• सारण पोळीभर पसरावे यासाठी सारणात जास्त पिकलेल्या केळ्याचा एक इंचाचा तुकडा घालावा आणि चांगला मळून घ्यावा. सारण पोळीभार छान पसरते. 

• सारणात खसखस किंवा तीळ घालायचे असल्यास ते अख्खे न घालता भाजून पूड करून घालावे. पोळी खमंग लागते. 

• पोळी करताना तिच्या कडा आधी कातणीने गूळ बाहेर येणार नाही अशा रीतीने कापून मग पोळी भाजावी. 

• सारणाचे पातेले गरम पाण्यात ठेवावे म्हणजे गूळ शेवटची पोळी लाटेपर्यंत नरम राहतो.

• पोळीचे सारण त्याची गोळी वळेल इतकेच सैल असावे. 

• सारण व कणीक दोन्ही सारख्याच प्रमाणात सैल असतील तर सारण पोळीच्या कडेपर्यंत पोहोचते. 

• कणकेत कडकडीत तेलाचे मोहन घालून जरा वाफ गेल्यावर ती घट्ट मळावी. यामुळे गूळपोळी मऊ पडत नाही. 

• मध्यम आचेवर गूळपोळी खमंग भाजावी. नाहीतर गार झाल्यावर पोळी मऊ पडते. 

• पोळ्या अतिशय हलक्या हाताने लाटाव्यात आणि सपाट तव्यावरच भाजाव्यात. 

• तवा आणि उलथने ओल्या कपड्याने पुसून घेऊन नंतर दुसऱ्या पोळीसाठी वापरावे. 

• पोळ्या करताना व डब्यात भरताना एकापुढे एक उभ्या ठेवाव्यात. एकावर एक रचू नयेत, मऊ पडतात.