गुलाबजाम : वळताना....

• खवा आणताना तो किंचित पिवळसर आणि रवाळ असा घ्यावा, असा खवा ताजा असतो. 
• खवा मळताना त्यात अर्धी वाटी पनीर मिसळावे. पनीरमुळे पाक अगदी खोलवर जातो व गुलाबजामही हलके होतात. 
• खवा मळताना मैद्याबरोबर थोडीशी दुधावरची जाड साय घालावी. गुलाबजाम मऊ व चविष्ट होतात. 
• खव्यात मैदा घालू नये. त्याऐवजी बारीक रवा दुधात भिजवून खव्यासारखा सैलसर गोळा करावा आणि सुमारे तासाने खव्यात मिसळावा. गुलाबजाम अगदी हलके होतात. 
• खव्यात मैद्याऐवजी गव्हाचे पीठ टाकले तर गुलाबजाम मऊ होतात. 
• खव्यात लिंबाचा रस टाकून खवा चांगला मळून घ्यावा. गुलाबजाम मऊसूत होतात. 
• खव्यात थोडीशी साखर मिसळावी, तळताना ती विरघळते आणि गुलाबजामला एक वेगळीच चव येते. 
• खवा खूप सैल झाला तर गुलाबजाम तळताना फुटतात. एक चमचा मैदा घालून खवा परत मळावा, फुटत नाहीत. 
• खवा मळताना त्यात दोन चिमूट वेलदोड्याची पूड मिसळावी, स्वाद चांगला येतो. 
• गुलाबजाम वळताना आत साखरफुटाणा किंवा साखरेचा दाणा किंवा मनुक्याचा दाणा टाकावा. साखरेचा पाक आतपर्यंत छान मुरतो आणि गुलाबजाम मऊ व हलके होतात. 
• गुलाबजामचा आकार लंबवर्तुळाकार करावा म्हणजे थोड्या तुपातच आतपर्यंत तळता तर येतात शिवाय थोड्या पाकात पसरट आकारामुळे जास्त बसतात. 
• गुलाबजाम तळताना फुटू लागले तर त्यात थोडा उकडलेला बटाटा मऊसर मळून घालावा आणि तळावेत, फुटत नाहीत. 
• खवा मिळत नसेल तेव्हा मिल्क पावडर वापरुन गुलाबजाम करावेत. 
• चांगल्या दर्जाची होल मिल्क पावडरच वापरावी. नाहीतर गुलाबजाम चिवट होतात. 
• मिल्क पावडरचे गुलाबजाम करताना मिश्रणात वेलचीची पूड घातल्यास गुलाबजामला मिल्क पावडरचा वास येत नाही.